[Abaya]

Do hob i doch grod de lezde Ausgab von da Bayan Tischtennis voa mia. Es is ned zum glaubn, do sted doch glad wos übas Tischtennis drin. A bisserl wos. Hauptsächlich wean hoid de Fungzionäre geehrd. Do san a grosse Buidl drin von de Fungzionäre. De miasn gross sei, damid dene eana Wambn a draufbassn. Ned olle san gwambad, de ned so gwambadn ham dann a gleanane Buidl. Hauptsächlich wern hoad de vom Präsidium zoagd. Da Präsidend is drin, seine Vize san drin, da Schuasda soga zwoamoi. Siebn Zendna auf via Buidl. Und dann hoid no a boor andere. I verstääs ja, wenns scho koa andara lobd, unsa Präsidium, dann miassn si si hoad selba lobn. De boor andan miassns neidoa, sonsd spannds ja a de Blädsde, das de Zeidung nua zua Selbstdarstellung des Präsidiums do is.
Sex Seidn lang nua Darstellungen, Gegendarstellungen, Ehrungen, Buidl von gwampade und ned so gwampade Fungzionäre. Jezd feid hoid nua no, das schreibn, wea mid wem schlafd, dann is des Nivo von da Zeidschrifd “Praline” erreichd.
Liabs Präsidium, füa den Scheissdregg, denz i do druggds, a no zwoa Euro verlanga, und des unda dem Titel „Bayern Tischtennis“, des is ja scho fasd Bedrug. Glabs ia, nua oana dad de Zeidung kaffa, wenna wissen dad, wos do drinsted. I dad ma ja a koa Tageszeidung kaffa, wenn im Sportteil drinsteh dad, da Beckenbauer hod sei Segredärin „körperlich verehrt“. Obwoi des bei dem vielleichd no unda Spord laffa kannd, dea is ned so gwambad.