|
Wos hoda gschriebn, da Präsidend in da Januarausgabe. Bayern Tischtennis kosd im Jor 70.000 Euro. Siebzgdausnd Euro, des san gschäzd hundadvierzgdausnd Mark. So viu Geld füa so viu Nix. Er hod a gschriebn, a Teil wird durch Einnahmen ersetzt. Guad meine 2 Euro, de i Bläda füa de Zeidung zoi, muass ma obziagn. Dann bleibn owai no 69.998 Euro, wei i ko ma ned vorstelln, dass aussa mia no an andan Blädn gibd, der füa den Scheiss wos zoid. Ja liabs Präsidium, woher kimmdn nacha des Geld füa eichare Selbstdarstellung auf Papier? San aussa mia doch noch andare bläd? Vielleichd de Tischtennisspila und de Vereine, de mid ihre Beidräg des finanziern? Vielleicht sogar de Steuerzahler? Ob de wissn, wos mid eanam Geld gmachd wird? Und koana von dene, und des san aussa eich im Präsidium wahrscheinlich olle, woin übahaupd de Zeidung in dieser Form. Wei übers Tischtennis ned viu drinsted, und des wos drinsted is meisdens verjährd. Do gibd des Präsidium 69.998 Euro aus, nua um sich seiwa zu präsendieren. Ja gruzitürkn, wia lang miassn mia uns des no gfoin lassn. Übaroi werd gspard, nua im Präsidium ned. Wos kannd ma mid dem Geld ois Vernünftiges macha. Gebzes doch eicham Verbandstraina. Na kon der vielleicht a zwoads Indernad aufmacha. Oda de Bezirke, füa de Jugendförderung. Oda schmeissdzes weg. Ois is gscheida, ois wia de „Amtlichen Mitteilungen des BTTV“. Des war a füas Präsidium nua vom Vorteil. Wei, wenn nämlich de Leid, de de Zeidung lesn, des san de, de de Zeidung gschengd griang, oiso olle aussa mia, moi an Vergleich ziang zwischen Präsidium und Zeidung, dann kumas vielleicht zu dem Schluss, wia kon de Zeidung guad sei, bei dem Präsidium.
@ günter
jezd bisd ma mid de Kosdn zuvorkemma. Aba du hosd recht, de Scheisszeidung zum Drugga kosd ja no mehr ois 69.998 Euro. De kosd ja 70.002 Euro.
Do wo i de Zeidung kaf, do sogd da Verkäufa zu mia, vor drei Monad hods no an zwoadn gebn, der des Bladl kaffd hod, jezd bisd da lezde. I brauchads a ned kaffa, mei Nachbar griagd de Bayern-TT mid da Posd und schmeisdz owai glei in de Papiertonne. Aba i scham mi, dass es rausdua. Sonsd woas mei Nachbar, das i de Zeidung lies. Und dan griasd er mi nimma. Wei omdrom wohnd oana, der hod de „Nationale Volksfront“ glesn. Den griasda a nimma.
|