[Abaya]

Ja do hobe ma hoid amoi im Adressnverzeichnis ogschaud, wea beim bededevau und in Obabayan ois füan Jugendsport zuständig is. Do gibdz an ganzn Haufa. Ganz om hockds Präsidium midm VizePräse Sport, Gerhard Schnabel, Adressverzeichnis Seite 2. Der sogd dann dem ordentlichen Mitglied für Sport im Verbandsausschuss, Gerhard Schnabel, Seite 3, wos a doa soid. Dea sizd a ziemlich weid drom und schafd desweng a o. Oiso delegierd ea an den Vorstand Sport, Gerhard Schnabel, Seite 8. Ja, wenn oana scho drei so wichtige Ämda in Bayan hod und de a ausfülln muass, und des duada, brauchsdn bloss oschaung, dann isa mid seim delegiern an si seiwa ausglassd und ko de Undagebenen nimma song, wos doa soin.
Zum Vorstand Sport kean no an ganza Haufa ordentliche Mitglieda, wia da VFW Hochleistungssport Alfons Biller und da Verbandsjugendwart Werner Reuß. Bei dem woas ma wos a duad. Dea organisierd de Trainingsaufenthalte der Jugend im Ausland, do fada hoid gern hi. Bin gspannd, wo er in dem Jahr hiwui. Unda dene hocka dan vui Bezirksfachwarde. Zu dene khead a da Schmiedel Kurt. Da Kurt, des is dea mid de dreizehn Ehrenämter in Obabayan, dea hod no mera ois wia da Schnabel. Oans von dene dreizehn ist Fachward Hochleistungssport. Das dea koa Zeid hod is doch klar, dea muass si doch scho dauand um seine andan zwöife kümman. Und dan betreibda seiwa a no Hochleistungssport, im Ehrenämtersammeln. Üban Kurt sitzt da Peter Stock, dem sei Symbadi guid am Breidnsport. Do koma si dan vorstelln, wos dea füan Hochleistungssport übrig hod. Unda dena gibds dan wida an Fachbereich Jugendsport und an Haufa Bezirksjugendwarte. Des ged dann oiwei so weida bis nunda zum Greis. Des san dann de Greiswarde, meisdns schaungs a so aus.
Ja durchorganisierd sans scho, da Verband und da Bezirk. Do gibds füa oa Abad an Haufa Zuständige. Und a jeda moand, wenn a Abad ostäd, da andere is zuständig. An de bor Traina bleibds dann henga, dÀbad. Des is a richdig, de griang ja Kohle dafüa, richdig Kohle, so wia hoid a guad bezahlda, ned ogmeida Auslända am Bau, so um de siebn Mark, d`Stund.
Jezd is mia a klar, warum de Ehrenamdlichn im Jugendsport olles Fachwarde san. Do ward oana auf den andan, und voa lauda Wardn kumd koana zu seine Abad. Zu ihra Abad, des ja ehrenamdlich macha, ohne das wos dafüa griang, wias ja imma wida betona. Ja soad ma dene füas Wardn a no wos zoin. Wenns a Geid füas nixdoa woin, dann miassns hoid Polidiga wearn, oda Leera.